Axl Rose February 6,1962 in Lafayetle,Indiana USA ah piang hi.A nu Sharon Lintnet hi in apa William Bruce Rose ahi hi.Axl Rose suah laitak a nu kum 16 pha pan in a pa zong kum 20 pha pan hi.Amah pen tapa tang neih sun ahi hi.Kum 2 bek a phak lai in a nu leh pa kikhen uh hi.A kikhen khit kum 1965 ciang a nu in Stephen L.Bailey teenpih kik hi.Tua tawh ta pasal khat leh numei khat nei uh hi.A nu in amin William Bruce Baily ci in kheek sak hi.Aman zong hun sawtpi sung Bailey pen a pa mah in ngaihsun hi.A unau uh pen a nei lai un a pa in vua den ahih manin innkuan dangte zong tua dana kivua zel dingin ngaihsun hi.Tuabang kawmkalah kikhop hah kat in biakna bel thupi ngaihsut vanglak uh hi.Kum 5 bek a phak lai in biak Inn ah la sa hi.Biakna ah ama hih theih zah in kizang hi.High School a sin sungin zong lasak leh music lam pen lunglut mah mah hi.Tua hun in Piano tum siam khinta hi.Lasakna ah a kihel ciang Baritone Range pen a aw key ahi hi.Ama aw key ngeina bel Tenor Range ahi hi.A aw pen a nam tuam tuam in laih thei hi.Hih dan a zat siamna pen School a music sinsak nu a sukbuaina pan hong kipan hi.A aw tuam tuam Bass,Baritone,High Falsetlo/Soprano te la tuam tuamah zang hi.Lafayetle a Jafferson High Schoolah kah in a tawp dong bel kah lo hi.Kum 17 a phak in a nu leh pa lai koihna mukha in tua pan Baily ta ahih loh lam kiphawk hi.A min tawpa Bailey cih zong Rose ci in khek pah hi.Tua akipan William Rose ci in a min hong gelhto ta hi.A pianzia a theih ciangin a lungsim na in a nuntakna kikhual lo hi.Khawsungah mi tawh kilai thei zel in 20 val vei bang kiman hi.Tua hunlai in Band Guitarist Izzy Stadlin tawh Hrivers education Class pan kimel theih uh hi.Rock Music lam lunglut tuak uh ahihmanin a lungsim uh kituak mah mah hi.Band tuam tuamah a nih un kihelto khawm uh hi.Kum 1982 ciang a pianna khua pan Los Angeles ah Stradlin tawh na semkhawm dingin pem uh hi.Tua ah Guns N Roses min tawh Geffen Records a Label a sign ding ciangin a min Dan mai ah W.Axl Rose ci in khel hi.Los Angeles a Band tuam tuam L.A.Guns,Hollywood Rose, Rapidfire etc. te ah kihel hi.Kum 1985 ciang amah leh Stradlin leh L.A.Guns a Bandmate Tracii Guns ten Guns N Roses phuankhia uh hi.Hih band min pen L/A Guns leh Hollywood Rose Band te min lakhawma kiphuak ahi hi.Hih Band ah L.A Guns leh Hollywood Rose te zong kihel uh hi.Amau teng thum banah Ole Beich leh Duff Mc Kagan te zong kihel uh hi.Axl leh Tracii Guns te ki theihsiamloh hangin Tracii tawp hi.Tua ciang Slash (Hollywood Rose kihel zelna) ah Lead Guitarist nasem hi.Tua pan album bawl sawm in Guns N Roses min pua ta uh hi.A debut album masa pen uh Appetite for Destruction pen July 21,1987 in US ah khahkhia uh hi.Tua tungin Copy 5,00,000 zuakkhia uh hi.Tour nei mun uh banah Music video Sweet Child O Mine leh Welcome to the Jungle hangin a album uh minthang tuam mah mah hi.Kum 1988 ciang Child O Mine lawhcin pih uh ahihmanin Billboard 200 Chart ah #1 na hong hizo hi.Tudong mah in US ah hih pen Debut album kitamzuak khiat pen pawl ahi hi.Leitung bupa ah million khat val zuak khia uh hi.Appetite Destruction pan Axl Rose pen Hard Rock Singer thupi pen a ngaihsun pawlkhat om uh hi.Rolling Stones Magazine bu kawmah zong kum 1989 in a limlak kisuang hi.Use Your Illusion I leh II pen September ,17, 1991 in khahkhia uh hi.Lawhcing to in Billboard Chart ah #1 leh 2 na hito khawm hi.Hi bang dinmun a tung thei om sun ahi uh hi.Ahizongin hibanga a than saan laitakun amaute kikalah buaina hong piang hi.Band member dangten Axl pen Band sungah kithunei sak lua ci in vuiphan uh hi.November 7, 1991 ciang Stradlin a band pan un tawp hi.Ama tangin Kill for Thrills Guitarist Gilby Clarke zang uh hi.Kum 1994 ciang tuapa zong tawpkik hi.Axl lawm Paul Tobias in ama mun luah kik hi.Tua khit ‘96/’97 pawlin Slash(Saul Hudson),McKagan leh Sorum te lungkim lo in band pan tawp uh hi.Tua khitciang Axl zong media lamah kilang nawn meel lo hi.A band member te uh khat khat in tawp uh hi.A band uh bel a tawp hi tuan lo hi.A tawpte munah midang lut kik zel uh hi.Axl in member tawpte dinmun luah ding midang zong zel hi.Zan ciangin member thak te part ding buaipih thei zel hi.Tua banah album thak Chinese Democracy zong buaipih kawm hi.Kum 2002 leh 2006 ciang album thak ading tour nei uh hi.Tua tungin member te a thak pian vive ahi uh hi.Tuate;Dizzy Reed,Robin Fink, Tommy Stinson, Christ Pitman, Richard Fortus, Frank Ferrer Ron “Bumblefoot” Thal te ahi uh hi.Amaute malakna tawh a dai khin Guns N Roses min tawh May 12,14,15leh 16 2006 ciang New York ah Live Concert neikik thei uh hi.A album uh Chinese Democracy haksatna tuam tuam hanga release theihloh zong November 23,2008 ciang release gemgam sam uh hi.Axl in zu,drugs leh khamtheih dangte zang hi.Ahizongin a addict leh khamtheih sala tang zahdongin zat sawm lo hi.Axl,Elton John leh Mercury te lawmhoih ahi uh hi.Elton John bang tawh tam veipi perform khawm uh hi.
No comments:
Post a Comment