Na Go Manpha Pen, tang-1
Sum-le-pai thu i kikupna ah a kihello theilo pen go (asset) leh bat (liabilities) ahihi. Asset pen ZoDictionary in “(n) van neih, neih leh lam zuak theih inn, huan, logamte” ci hi. A tom in sum suah theih i gote ahihi.I gensa bang in i innsung leh mimal sum-le-pai zeekna ah a kicing zaw leh a nuam zaw nuntakna i lunggulh leh i septheih nam nih om hi – i sum zatzah khiam ding, ahih kei leh, i sum muhna khangsak ding. Tuni in i sum muhna khan zia ding khat kikum ni. Tu laitak na go manphapen leh lianpen in i sepna (job) ahihi.Bang hang in i sepna i go manpha pen hiam, cih en ni.Nasepna Manphatna Nam 5Na sepna in, na hihna ahihi: Na sepna in nang hihna (identity) hong pia hi. Na ut in na ut kei zong in, mite in na nasepna in hong ciamteh ding uhi. Sazuakpa, mehzuakpa, Sangsiapa, Doctorpa, Siapa, ci-in i sepna hang in min hong kipia a, tuate i hihna hong suak hi.Na sepna in na nuntakna dinmun lak hi: Nasep pawlkhat ah sum tamlo a, sum tamna nasep zong om veve hi. Tua man in, na sepna in na nuntakna dinmun (living standard) hong lak hi. Kumpi nasem na hih leh na ngawl kei ding a, na hau kei ding hi. Nangma mimal na sem na hih leh na hau mahmah thei a, zong na ngawl thei ding hi.Na nuntakzia lak hi: Na nasep pen laigelh hiam, lai tawh kisai khat peuh ahih leh, sabuai tawh a ki gamla ngei mello khat na hi ding hi. Thu ngaihsunsun mi khat zong na hi ding hi. Galkap khat na hih leh sabuai cih thadah, innsung ah zong na om man kei ding hi. Ngaihsutna sang in sepkhiatna na ki-vazaw ding hi. Na sepna hang in khualzin kisam den hiam, ahih kei leh, khua khat sung ah om den ding khat na hi hiam, cih pen na sepna in sai hi.Na innkuan vakna sum naak hi: Na nasep in na sum naak hi a, tualo in sum na nei kei ding hi. Tua man in, manpha mahmah hi. Na summuhte tawh ne in na dawn a, silh-le-ten, inn-le-lo hong pia hi. Tua bek hilo in na innkuanpihte na vaak a, na tate mailam nuntak nading leh pilna-siamna neih na ding in saang na kahsak hi. Na sepna hang bek ahihi.Na mailam nuntakna ding hi: I sepna tawh kituak in i mailam nuntakna zia ding nangawn genkholh theih hi. Na nasepna ah na khantohna (prospects) a tam/om hiam? Na sepna organisation/company a liat le neu in zong sai ding hi. Sumbuuk ngak khat na hih leh manager ciang na khangto thei kha ding a, tua tung ah a sumbuuk neite hi kha ding hi.I sepna in i nuntakna ah thu tampi leh i nuntakzia nangawn sai mahmah hi. Tua man in nasepna khat peuhpeuh pen saupi muhna leh ngimna tawh a zong lai ding te in zon ding ahihi. I mimal lunglutna leh siamna i neihte tawh zong a kituak hiam cih pen ettel mahmah kisam hi. Tulaitak i nuntakna leh i mailam nuntakna nangawn pen i sepna ah kinga mahmah hi. Tua man in i sepna bang ci leh a manphapen a zang ding cih leh i sepna bang ci manphatzaw sak lai ding cih zong ngaihsut ding a thupi khat i ka tuat hi.Mangkam in, actively manage your career cih khat om hi. I sepna pen nisim va kuan ding a, a kha cin ciang sum la cih bek tawh hi theilo hi. Na nasepna ah khantohna (promotion/increment) na sepzah tawh kituak na ngah ding pen a kilawm leh a hoih khat ahihi. Tua ding in nang mah in tupna leh ngimna na neih ding ahihi. Na nasepna na kep ding leh na puah ding ahihi.I sepna a manphatzawk nading in lampi nam nih om hi:Promotion – ZoDictionary in, kahtohna, khantohsakna, za khanna ci-in gelh hi.Increment - ZoDictionary in, sum ngahzah khanna, khasum khanna ci leuleu hi.A tangpi in za khanna leh khasum khanna pen kizui zel hi. Ahizong in, kizui teitei ding cihna hi tuanlo hi. Za i cih pen sum a tamzawk man bek in a kideih hilo a, a tung a i nasepna manphatzia nam 5 i gente hang zong ahihi. Khasum khanna in za khanna a zui kei zong in lungkimna leh hihna lianzaw, thupizaw hong pia thei hi.Za Khanna leh Khasum Khanna Bang Ci Ngah Ding Tup-le-ngim kician nei in: Midangte tawh kiteh ding hilo a, ei-le-ei kiteh ding ahihi. Tu’n sepna nei na hih leh na maban bang hi ding a, koi ciang kalsuan ding na hiam cih ngimna leh tupna nei in. Sepna nei ta’ng ci’n kilungmuang sak, kilungkim bawl kei in. Na tupna leh ngimna zahzah in na za khang in, na khasum leh na nuntakna khangto ding hi. Na managerte leh siate na ngimna, na lungulhna a kilawm leh kituak in theihsak in. Amau zong mi muanhuai leh makai ding a zong tawntung uh ahihi. Na company neite in mi gina leh muanhuai kisam uhi.Na sep ding val sem in: Na sep ding (tavuan) zo mahmah in. A val in zong sem lel in. Manager na lunggulh leh manager khat i nasep zah sem in, siam sawm in. Hih kei sep ding hi kei cih nei kei in. Za khanna ding leh khasum khanna ding in na za tawh kituaklo liang in na nasep kisam hi. Na tungsiahte in hong mu in hong pakta ding uh a, za khanna hong pia ding uhi.Na tungsiahte theisak in: A tung a i gente na tungsiahte na theihsak kei leh phatuamlo thei hi. Na ngimna, na lunggulhna, na nasepna khempeuh (a diak in a hoih leh a val na sep peuhmah) na siate, na managerte lak in theihsak in. Zomite pen a tangpi i hoihna lam gen ding haksa kisa hi. I company makaite, a neite, leh managerte in i sepna khempeuh hong theilo uhi. Tua man in eimah mah in i lak ding leh i theihsak kisam hi. Na lawmte’n zong nang nasep hong gensaklo ding uhi. Nangmah in na sepna ah za khanna leh khasum khanna ding tavuan na lak ding ahihi. Na managerte vaihawm ding ngak kisam denlo hi!Ngen in!: Na sep ding val sem in, na tungsiahte na theihsak khit nangawn ciang in za khanna leh khasum khanna na ngah kei lailai leh na nget ding ahihi. Ngen in hong ki pia ding hi cih phawk in. I managerte leh siate in i manphatna phawklo thei uhi. Tua bang a na nget ciang in, na siate in bang hang na za khansak ding ka hiam hong ci kha ding hi. Bang hang na khasum khang tuam ding hiam, na lawmte a zong khanglo pi, hong ci thei hi. Tua ciang in nang na citna, na siamna, na septheihnate na lak ding hi. Kam nem tak leh maitai tak in na gen ding hi. Hehna in hehna leh thangpaihna bekmah piangsak hi.Hong kipia kei leh e? Na za hong ki khansak kei a, na khasum hong kikhan sak pah kei leh, bangteng sem leng ka za khangthei ding hiam cih na siate dong lel in. Za khan ding na deihna, lunggulhna kilang ding a, a sem ngap, a kithalawh ngap mahmah na hihna kilang ding hi. Na siate’n hong gen pahloh hang uh, hong pakta giugiau khin ta ding uhi. Na za khan ding leh khasum khan ding pen a hun bek in sam hi thei hi.I leitung go manphapen i sepna, a manphazaw leh a thupizaw a i bawl ding, i zat ding pen Pasian deihna tawh zong kituak hi. Talent hong kipiate a zah tampi a khangsak ding leh meetsak ding i tavuan ahihi.
Na gou manpha tang-2
Khatveivei, i sepna ah haksatna tampi kituak thei hi. Lawh (khasum) a khan ding bang a khanglo; hihna (position) i deih bang in khanglo ahih-kei-leh office sung a i seppihte tawh kituaklohna hang leh i makaite (management) in i deih bang hong kinloh ciang in bangzahta in thanuam in i hahkat hang in phattuamlo thei hi.Tua hun ciang in i sepna company/organisation laih lo buang kilungkim thei nawnlo hi.Sepna zong kik ding kithawikholhnaAmasapen in i sepna khawl pah tawp pah ding hilo hi. I lungkimlohnate i theihsak zawh ciang nangawn a hong thudon kei uh zong in, limtak in sep tohtoh lai ding ahihi. Bang hang hiam cih leh, i khasum kisam veve lai hang a, i company pan i tawp ciang experience/recommendation certificate i sepna thak ah kisam thei hi. Lungkim tak leh piciang tak a kikhawl ding ahihi. Tua ciang India context ah, company khat ah kum nga (5) val na sep peuhmah leh gratuity om thei hi. Tua ciang PF ahizong sum na ngah ding omlai ding hi.Tawp i sawm ni kipan in i resume/biodate ahizong puah ding in, company i deih zawk a omte kiang ah lak in, interview va pai in, sepna thak sem khawm mah in zon ding ahihi. Na muhpahloh hang sepna khat neilai lel na hihman in kinawh zon kisam hi.Pilvang tak leh mailam saupi etna tawh sepna thak zon ding ahihi. I sepna ah i tuahkhak nuamlo i sakte i tuah kiklohna ding in ngentel leh pilvang tak in i company etna sittel ding ahihi.Sepna bangci zon ding I company/organisation lui sang a hoihzaw: Sepna thak i zon ciang in i sepna lui sang in a hoihzaw kizon hamtang ding ahihi. Company ‘brand’ minthang zaw leh management kician zaw deihhuai hi. I sepna company in zong a thupi hileh mite’n zong thupi sim in, tua sang a manphazaw lai, ei-le-ei kithupi simna, lungkimna leh kimuanna hong pia thei hi. Kilian sak ding cihna hilo in, self-respect (ei-le-ei kizahtakna) i neih theih ding thupi zaw hi.I hihna sang sangzaw/hoihzaw: I sepna i laih ciang in i hihna lui sang in a sangzaw zon hamtang dingahihi. Company a lian zaw leh brand lianzaw bek hilo in nangmah mimal hihna (position/rank) hoih zaw omna zong in. Tua bang in khangtohna leh picinna hong pia hi.Lawh/khasum leh benefits hoihzaw: Company khempeuh ah benefits kibanglo hi. Company pawlkhat in a nasemte uh thupi simlo uh a, pawlkhat in a nasemte manphatna tel cian mahmah uhi. Best employer of the …..cih bang minphatna a ngah company-te ah sepna zong in. Tuate na hoihzaw hamtang ding uh a, a nasemte khantoh na ding leh siamna (skills) sinna zong sum tampi bei mah in hong pantah ding uh a, tua in nang siamna leh manphatna hong khangsak ding hi.A tungate sang a kisam zawlai khat: A tunga i gente sepna khat pan lungkim (nawn)lo a sepna thak na zong ciang a kisam mahmah vive ahihi. Ahizong in tua teng thum sangin nangma lungkimna leh lunggulhna thupi zaw lai hi. Nang lunglut lam nasepna, nang siamna lam nasepna ngah peuh leteh a dang thumte bangmah hilo zaw hi.Eimah tawh kituak nasepna muh ding leh neih ding a thupi khat in ka tuat hi. Bang hang hiam cih leh, i sepna mun ah ni khat nai 12 sung bang hun kibeisak a, i nuntakna tamzaw hun i sepna a bei hi. I sepna ah tuabang in hun ki bei napiin, sum tamman leh za hoih man bek tawh lungkimlo leh lunglutlo pi in va sem lehang ei a ding in (lung)gimna leh thangpaihna hong tun veve ding hi.
