TELEPHONE MUKHIA MASA PEN IN ALEXANDER GRAHAM BELL HILO IN ANTONIO MEUCCI NAHI ZAW
Zomi te Media lam thu kizakna lamah kiziakai mahmah ahihmanin abeisa hunte ihnung sutsut hongkul ta hi cih kongtheisak masa nuam hi.Leitung ah mi khempeuhin a hipen,a siampen leh a mu masa pen cih min deihna tawh mipil tampi takin hong khemkhem uh a,tua te anung katkatna uh hunsawt nailo himahleh Zomi te'n kilaplo lai ahih manin enzongh ihnung zuihzuih kulta hi.
Mi khempeuh theihna-ah Telephone mukhia masa penpen Scotland mi, Alexander Graham Bell (1847-1922) hi a,hipa pen zuaukhempa,mi citaklopa hi'n,a mukhia cil taktak papen Italy minam Antonio Meucci (Mi-yu-chi) nahizaw hi.
Meucci pen April 13,1808 kumin Italy gam, Florence khua ah nasuak a,1830 kumciangh Cuba gam ah navaai uhhi. Amah pen Electric tawh natna tuamtuam zonkhiatdan akankan mi ahi hi.Hidan akatkatna pan datkhau sungah " AW " paithei cih hongmukhia hi.Tua zawhteh 1870 kumin Meucci pen a zi tawh USA gamah navaai leuleu uhin New York kiang ah nateng uhhi.
Meucci i azi pen kawngnuaisiah zawcip damlohna nei ahihmanin lupna tungpan thoto theilo ahihmanin Maucci in innsung a nasepna peuhpeuhpan kiho theih nadingin bawngnawi bunghawm 2,ataw vutvangin khau tawh zomkhawm a,tuadan in azi lupna paikullo in kiho theihna namukhia hi.Tuadan Telephone system i kipatkhiatdanpen 1860 kumin New York khuapi ah lahna nanei hi.
Meucci pen mi cimawh mahmah khat ahihmanin a muhkhiat telephone system adingin copy rights ngah nading in register bawlkul cih thei napi'n nabawl zolo hi .Tualai in register bawl nading $250/- thunkul a,tuading naneilo hi.
Tua khitteh Meucci pen Alexander Graham Bell tawh munkhatah naa hongsemkhawm uhhi.Graham Bell zongh Meucci dan a,Electric tawh natna tuamtuam zongkhia pawl nahi a,Meucci in Telephone system kipatkhiatna khausungah " Aw " paithei cih a mukhiat nathu nathei hi.
Meucci in siikkhau,datkhau bawlna company, Western Union ah amuhkhiat thu te khempeuh semkhawmdingin lai tawh nakhak khawm a,Company te'n kimuhkhop nading hun napia vetlo uhhi.Tualeh tua amuhkhiat thu lai tawh akhaksa khempeuh Company ah a ngetkikleh napianuam nawnlo uhhi.Tuazawh kum 2 khit 1877 kum ciangh, Graham Bell in Telephone bawlkhiatdan copy rights adingin register nabawl a,na ngahpah hi. Bell Company ci'n Telephone Company nabawl a mihau sumhaupi kisuakziau hi.
Telephone system mukhiacilpa Meucci in thuakzolo ahihmanin a neih alam tampi bei in Bell pen thukhen zumah nakhia hi.Muecci in 1869 kum lai a,a muhkhiat,a bawlkhiat te thukhen zumah alah takteh thukhen te'nzongh zahtakna napia uhhi.Tua bangtengtawh Bell pen gilbeem khumding dinmun honghita a,Meucci pen lunggim natna tawh October 13, 1889 kumin a nuntaakna hongbeita hi.Amah hongsih takteh athu uh laklawh takin kibeisak pah hi.
A hizongh Italy mipil te'n kum 100 val khitteh a thu na pholhkhia kik uh a, June 15, 2002 kumin, American Congress makai te'n Leitung ah Telephone mukhiacilpen Scotland mi Alexander Graham Bell hilo in, Italy minam Antonio Meucci nahizaw hi ci'n Leitungbup zakdingin nataangkokhia uhhi.
