Khatvei ansai khatah anne dingin ka tu hi. Tua ansai pen khua tawh tai khat bang kigamla in gamdai dide hi. Anne dingin tutna ah tu in annek dingte ka vaikhak hi. Tua leh kei tawh a kigamla lona munah nasiataka kikona aw ka za hi.Thokang khat in tawletman a phut zawh nadingin a hanciam lua kisa hamcihtakin ham vauvau hi. A tha neihzah tawh a piang zolo ding munah na vasem hi. A hi zolo ding munah a thatang mawkpaih hi. A ma tha tawh tawletman phu zo ngeilo ding hi.A aw neihzah zangin a tha neihzah tawh a zap hi. Man phu tantan hi. Na gual zawh kei leh hanciam in, na zawh dong lungkia lo in sem in cih thubullet te zia dan in hanciam cih ka mu hi.A hanciam mahmah hang thokang a dingin suahtakna lampi omlo hi. Ama tha lel tawh tawletman kitam zo ngeilo ding hi. A taktakin a ngaihsut loh manin hih mun pan a suakta lo bek ahi hi. Thokang in a ma tupna a tun madong ka sih leh ka sih ci in hanciam hi.Dahhuai kasa hi. Tua munah a mah si takpi ding hi.Tua tawlet pan lam nih a kigamla na munah kongkhak kihong deda hi. Kal nih khawng lengphei ziau leh ama tupna, ngimna ahi a pualam va tungziau ding hi.Si deka a hanciamna mun pan tawlnga in lungngai photin a suahtak nang lampi zong hileh mu ding hi.Tawletman kitapkullo in hih khansung pan suahtak nang lampi a gei mahmah ah na om gige hi. Atheite ading baihin ol mahmah lel hi.A hahkat mahmah thokang in a bang hangin a suahtak nading lampi dang ngaihsun khalo ahi hiam, A telsa lampi zuizolo na pi in bang hangin tawn tantan hiam, hih lampi tawnin hanciam tentan leng tangtung hamtang ding cih bang hangin pum upmawh mawk hiam, sih leh sih hih lampi mah tawnin kalsuan hamtang ding, ka cihte ka cih a cih tentan hangin bang phattuamna ngah a hiam.Thokang adingin a hoih pen lampi hikha thei mah ding hi. A hizongin a khasiathuai khatah a ma sepzia, a upna, a ngimna te banga a tawtna lampi pen sihna paina lampi nahi gige hi.Hanciam, gualzawh keileh lungkialo hihsang hanciam zaw kan ding cih pen mun khempeuhah zat theih hilo hi.Hih thu meilet in a gualzo ding cih upna neih huailo hi. Hih thu meilet le pomin i neih khak leh buaina hong tung thei ding hi.Na lampi tawt ngaihsunkik in. Kisittel kik lo in hanciam leng tangtung cih thu upna tawh na kalsuan leh bel gualzo cih thadah na gualzawh nadingte zong a susia na hi hi. Na nuntakna kisit den in. Na lampi enphapha in. Hangsan takin lampai in, ngaihsun sa in mainawt in. A pianzawh keileh lampi dang zongin tawn in.Hanciam mahmah na pi in na nawkzawh loh hun ciangin thokang na phawk tawntung in.
