Tulai khangthakte lakah One Direction Band minthang mah mah hi. La thak nei pian den uh banah a late uh zong hoih thei hi. A diakin naupang lam ten paakta uh hi. Band naupang tak himahleh khangto mah mah hi. FB leh Twitter lamah ah a zui tam peuhmah ta hi. A mimal ciatin zong minthang thei vanglak uh hi. Lasak zong siamkim uh hi. One direction Band member laka Zayn Malik tangthu anuai bang hi.Zayn Malik kum 1993 January ni 12 in Bradfort, West Yorkshire, England ah Zain Javadd Malik minpua in piang hi. Apa Yaser Malik hi in anu Tricia Malik hinapi Nee Brannan ciin kitheizaw hi. Irish leh English kahbia ahi hi. U numei khat Doniya Malik banah nau numei nih Waliyha Malik leh Safaa Malik nei hi. Yorkshire lama piang himahleh East Bowling lamah khangkhia hi. East Bowlingah a om sungin Lower Primary School passed hi. Tong High School ah zong kah ngei hi. Hih school pen state comprehensive school ahi hi. Lai siam hetlo ahihmanin High school a kahlai in subject pawlkhat ah mark tam muh hetlo hi. High school a kah laiin kum 12 bek pha panin X-Factor ah kilang hi. Sangpi tung zolo himahleh judge ten a talent mukhia uh hi. A naupan tung panin la leh music lam siam vanglak hi. Zatep hai mah mah ahihmanin a lawm ten ‘Cigratte smoker’ ciin sam zel uh hi. Kum 2011 dong a lawmte lakah amah za hai pen ahi hi. Kum 2010 in kum 17 pha panin X-Factor ah ‘Let me Love You ‘ cih lasa hi. Judge thum – Simon, Louis leh Nicole ten siamsa kim uh hi. Ahizongin mipi maiah tamvei kilang nailo ahihmanin zumpian hi. Simon bangin stage a om dan ding thuhilh hi. X-Factor ah aki lat khitciangin One Direction Band ah lut hi. A lut khit phet in recording neito pah hi. Kum 2012 February ni 29 in ‘Up All Night’ album hawmkhia uh hi. Gam tuam tuamah tour nei uh a minthang mah mah uh hi. Tour neih sungin a tanaute sihna hangin UK lamah zin hi. Kum 2010 in X-Factor contestant mah kum 20 mi Geneva Lane tawh ki ngai uh hi. Amah sangin kum 3 in upa zaw hi. Kum khat kiim kizui uh hi. Kum 2011 ciangin X- Factor contestant mah 7 runner up kum 24 mi Rebecca Furgusson tawh ki ngai kik uh hi. Kha 4 sung a kizuih khitciangun kum 2011 july kha in kikhen kik uh hi. Rebecca tawh aki khen khit ciang X-Factor season eight a khatna Little Mix Band member Perrie Edwards tawh ki ngai kik uh hi. Kum 2012 May ni 30 in Zayn in perry tawh a ki zuihna thu official in genkhia hi. Malik a paakta mi tam peuhmah uh hi. Kum 2014 July kha dong twitter ah a zui million 13 pha hi.
