Khangno(Zi/Pasal nei nailo)te' tungah ngaihsut piakna
=> Na lawm ngaih nu/pa tung panin itna maan taktak na ngah nop leh Pasian' deihna tawh a kituak lo teng hemkhia masa in.
=> Na lawm ngaih nu/pa cih bangbang na man manin hong it ding sangin, Pasian deihna bangin nungta a, Pasian in hong it ding thupisak zaw in.
=> Na lawm ngaih nu/pa nang tungah lungkim/lungdam ding sangin, nang tungah Pasian' a lungkim/lungdam ding thupisak zaw den in.
=> Na lawm ngaih nu/pa cih bang mang lo a, ama hong muhdah ding sangin, Pasian deihna bangin nungta lo a, nang tungah Pasian a lungkim loh ding lauhuai zaw hi.
=> Na lawm ngaih nu/pa sangin, Pasian hun na piak ding thupisak zaw in. Pawlkhatte in a lawm ngaih nu/pa ading bekin ahun uh beisak uh a, Pasian ading hun nei nawn lo thei uh hi. Nang tua bangin na om kei ding hi.
=> Na sunga om itna sangin,na pumpi(melhoihna)a deih zaw leh a lunggulh zaw pawlkhat om ahihna phawk gige in la, pilvang takin kidawm in.
=> Mi khempeuh um pahpah muang pahpah kei in la, ahi zongin mi khempeuhte up theih muan theih dingin nuntak sawm in.
=> Na lawm ngaih nu/pa cih bangbang mang lecin hong it kha mah dinga, ama cih bangbang na man' zawh nawn loh ciangin, hong itna kiam/bei lel ding ahihna phawk in.
=> Lawm ngaih pen a ngeina dan leh cimphawng bangin ngaihsun kei in la, khang tampi ading asia/apha kipatna bulpi ahih lamtak zong phawk gige in.
=> Mi namdangte pi-et tuan se kei in la, na mipihte zong neu muh pah se kei in. Kua sungah itna maan taktak om zaw a, kua tawh kiteeng leng, ka Pasian leh ka tu leh ta khang adingin hoih zaw ding hiam cihte limtakin ngaihsun zaw in.
=> A piantheih maimai nak leh, gamkhat, minam khat, khua leh tuikhat leh upna kibatpihte mah teenpih leeng hoih pen ding hi.
=> Na lawm ngaih nu/pa pen mi kician khat ahi takpi mah hiam cih kan masa in. A mel hoihna enin mawk ngaih pah kei in. Lungsim hoih maw hoih lo cih leh gamtatna lamah bangci nuntak cihte theih masak sawm in.
=> Pasian' deihna banga ki-it/ngaih theih lohna nungah buaina leh haksatna lianpi om ahihna phawk gige in.
=> Nang sangin Pasian a thupisak zaw bilbelte khawng hoh ngai lel lecin khial lo zawsop ding hi teh.
=> Online sung panin zong huih thau kilawn ziahziah ahih manin kidawm mahmah in. Hih huih thaute in hong kha taktak leh nat tuak veve mawk hi.
=> Amah sangin Pasian na thupitsak zawkna hangin a lungkim lo na lawm ngaih nu/pa pen hong it/ngai taktak lo ahihna phawk in. Bang hang hiam cih leh Pasian a thupisak mite' tungah a lungkim/lungdam theilo, lawm ngai nu/pa sungah Pasian kiang pana hong pai itna om lo cihna ahi hi.
=> Na lawm ngaih nu/pa in, Leitung thu sangin, Pasian thu lamah hong thahat pih zaw hiam cih en gige in.
* Bang bang hi ta leh, Pasian a it/zahtak khawm lawm kingaite ki it/ngaihna mah hong kip hong kho dinga, tua bang mite mahin innkuan hoih/nuam hong lam khia-in khazih gam zaisak zo bek ding uh hi.
