Lungdambawl (Christmas) pen kum sima i zat leh Christian te adingin nithupi khat ahih manin a tangthu theih huai hi. Christmas pen Pasian tapa Leitung mite tankhia dinga mihing banga hong pian ni cileeng kikhiallo ding hi. Kum zalom 3 na pawlin Rome khua ah Christmas kipan hi. Kum 375 AD pawlin saptuam (pawlpi) ten December 25 ni pen Christmas ni a zat ding na thukim uh hi. Louis Duchesne in Kum 1889 AD in Christmas pen March kha ni 9 ni pana simin a kha 9 na ahi hi, cih na gen hi. United States lamah zong 1870 kumin Holiday dingin na kipsak uh hi. AD 800 kuma Christmas zat na ah Charlemagne Emperor lukhu ki khu sak hi. Tua akipan Christmas pen miten hong thupi ngaihsut sem sem uh hi. Kum 855 AD Christmas ni ciang Edmund kumpi ding in sathau kinilh hi. Kum 1066 AD a Christmas zatna ah zong William I England kumpi lukhu kikhu sak hi. King Richard II in kum 1377 a Christmas zatna ah bawngtal 28 leh Belam (tu) 300 na go hi. Tua hun laia kipan in zanvaak (carol) zong na zang uh hi. A inn kim leh paam te uh sawlbawk etlawm nono leh khaugui zam tuam tuam tawh na zem uh hi. England ah suakta taka Christmas kizat tak tak pen kum 1660 a King Charles II in kumpi hong sep a kipan ahi hi. Kum 1870 in United States President Ulysses in Christmas pen federal Holiday hi sak hi. Australia bang ah kum 2008 in Guiness World Record Break zo dingin Christmas Parade na bawl uh hi. Mipi tengthum (3 lacs) bang na paikhawmthei uh hi. Christmas zat na a kihel gige pen Santa Claus leh Christmas tree ahi hi. Santa Claus (Christmas puteek) Image pen Cartoonist minthang Thomas Nast in kum 1863 a ,a bawl ahi hi. Kumsim in a design khel khel in, tulaia i muh te pen kum 1880 kiima a design ahi hi. Kum 1920 kiim pan miten thei mah mah ta uh hi. Leitung mun tampi ah Santa Claus in letsong (gift) pua in naupangte kiangah hawm zel hi. Tuamanin hih pen naungek Jesu kianga letsong piak etsakna ahi hi. Christmas Tree a kizatna pen kum zalom 18 hun pawl hi in, Germany gamah na kizang masa hi. Kristmas singkung pen innkiim leh kiang zep nanga kizang ahi hi. Gam khangto te ah Inn kiim innkiang bek tham lo in lamziikpi te nangawn zem uh hi. Meitang a nam tuam tuam khai uh ahih manin etlawm mah mah hi. Gam tampi takah Christmas hun sung pen sum leeng a tam hun laitak ahi hi. A hun hong nai ciang Christmas tawh kisai van a tuam tuam kizuak hi. Tua mah bangin mi tampi tak in vanthak khat peuh peuh leisawm uh hi. Mizoram bangah Khristmas ciangin Puanthak ki lei ngeingai zel hi. Tua ahihmanin kizep kipuahna lamsang a zuakte in khawng peuhmah uh hi. Gam khangto pawlkhat te ah Shopping Season danin kizang phial hi. America bangah Christmas sunga sum kizang bek bek pen $4 Billion bang pha zo hi. Nidangin a kuama ciatin Krismas kingaklah in, zong nuam kisa hi. Biak In mah ah Pasian kiphat khawmin ki zanhak zel hi. Ahizongin hun hong pai zel ciangin khangno pawlkhat in Biak Inn a khristmas zat pen nu leh pa te ading bek in ngaihsun pian mawk uh hi. Tuamanin lenkhawmna ah khangno meelmuh ding tawm hiai hiai ta. Bang hang hiam cih leh a Christmas thu sangin bangci leeng nuamsa thei ding cih ngaih sun zaw uh hi. Pawlpi mite tawh zatkhawm sangin lawm leh gual tawh zat ding hong vaihawm ta uh hi. Tua dingin sum mah kitangsam ahih manin nu leh pa mah hong phu zel veve uh hi. Cik mah a zu ciam ngei lo nangawn in lungdambawl muak na ci in hong ciam uh hi. Hai khat a dawn khit uciang hong ban pai zel in phamawh sak zong hong nei nawn lo uh hi. Khawlak ah hong vak uh a, mi tawh hong ki hih buai tak uciang, nu leh pa te adingin lungnuam taka pasian biak hong haksa ta hi. Hih zong nu leh pa adingin vai haksa khat ahi hi.Nu leh pa lungkhamna guan kei thei leeng hoih ding hi. Nidanglai a gamtuam tuam a Christmas zatdan i genna te pan miten thupha bawl nanga a zat dan uh kitel hi. Nuam ni,lungdam ni leh kipah ni ahihmanin eipau in lungdambawl na kici liang hi. Ahizongin khangno a tamzaw in leitung gualnopna tawh zang uh hi. I lungdambawl zat dan man lo cihna hi pah maw? Christmas khit kha thum khawng pai pana gilpuak kengkung khawng peuh om thei lai hi.I Christmas zat dan te ah Jesu a lungdam diam cih ngaihsun ni. Mihingte’ Birthday iki lawpsak ciang zong a kilawm a kituak khat kithei sam hi. Leitung mawhna te a puakhia topa Jesu birthday pen thupi ngaihsut huai hi. Hi thei leh midangte huh nangin zang thei leeng deih huai. Tua hi leh mite’ a lungdamsak leh midangte adingin thupha khat ki hi thei ding hi. Hih Merry Chrismass hun tawmno sung ah mite ading in thupha na bawlzawh kei phial leh zong, Mite ading in haksatna / mawhna bawl nangin zang ken.
No comments:
Post a Comment